عاطف خيري-الناس المهابة

مدخل:

نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر .. عبيد


الشعر وحده يتحدث

الجالوص


معتوقة ومعتقة ومنعتقة
نوافير إنتشاء وحشمة
وحَـمار العين ..
تضحك كلما وقعت مصيبة
تمشى على العجين وتلخبطو
وترطن إذا جاها الحنين
************
يا بت بيوت الهجعة كيف ؟
غبار شوارعك ماشى وين
زقاق يفتش فى زقاق
كتمة وضلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
***************
صوتك وكت قطع البحر
قبال مراكب العمدة
ضهر النيل عرق ..
والشمس فوق حبل الغيوم
شرت جلاليب النعاس
ناشف غرب مبلول شرق
والمطرة زى شفع العيد
تدخل غرف كل البيوت
حكمة الجوع الشرح للأرضة
كيف تقرأ المرق قبال يقع
فوقـك سقف
إتنحنح الجالوص
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
**********
مبنية مدن الخوف
من طينة آخر الليل
وانا فى سقالة الشوق
قدح البصيرة تقيل
فاتح زريبة الجوف
تمرق تخش الخيل
على كيفة كيف معلوف
ضهر المظنة يشيل
وانا ظنى ظنيـتـو ..
فى النيل غريق فى النيل
و الليل ولافى بالو ليل
ساكت يغنوا على القمر
واجعنى فى البحر السكات
سكتنى فى الوجع البحر
يا بت صباح الطير
وين البلد ركت ؟
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الحريف
داسينى فيكى نضر
والأنبياء فاتوا
والأنبياء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ما ذنب جلد الطار
لو غنو بيهو شتر
ما تخافى الله معاك
وكل الملائكة سمر

أقراك مرّة صاح
عكس إحتشادك فى الحضور
هل غاب معاك وعى الطريق
أم بيكى زكـّانى الزمن
ماشيك وعارفك يا حريق
فى يوم غماماتك بجن
فرهد غيابك أغنيات
ظلت أراضى اللقيا بور
بلقاكى يا كل الطيور
مسجونة والحرية سور
وبلقاكى بيناتنا الثبات
وبيناتنا شمس البكرة فى لحظة مخاض
*******
طول الوجع رشـّح مواطن العافية فيك
خلانى أرجع وأبتديك
وأقراكى من كل الجهات
ومابين أقابلك ومشتهيك كان حلمك الأول
ترفْ
وكنتى الصبية الغايبة
فى زحمة حجا وكلمة شرف
كنتى الزوايا الميتة فى متحف خزف
كنتى الوصايا العشرة واللون الشحيح
*********
سميت مساحاتتك حكر
كل البيحلمو ا بى الشمس
هجـّرت من واقعك عبث
سكـّنت فيك ضد السكون
كل اللى كان ممكن يكون
وطارت ضفيرتك ليل غنا
جدلة صبُر وطولة نفس
*******
ومابين أقابلك وجيت عليك
كان عندى ليك بس نحنّ والجرح الثرى
وخيبة أمل أم الشهيد
فى الكلمة والوجه الجديد
وكان إحتقان نبض الزمن
نومة طفل فوق الدّمن
يا صاحية بى الحاصل علىْ
يا نايمة عن فقرى البليد
سميت منافيك الوطن
صبحت مناحاتك نشيد

اقتراح+شهيق
كلمات / عاطف خيري
نكــــر صــوتك صـــداك
غــالــطــني الـزمن فيك
شــهرت عــلى الجــفاف وعدك
بطاقاتنا الخريفيـة .
رجــع فاضـي الكــلام مليان
معــاك إتــبـرجـت غـيـمة
وشهق جوايا صوت جدول
مـرقت على المطر حفيان
لـقـيـتــك والــرذاذ مــدخـل 000.
ونـاديـتـك …أقـيـفـي مـعاي نشيل كتف الغناء الميل
ونتخيل حلم دونك بيتحقق
وقبلك خيل دماي واقفة علي شرياني تتشهق
وبرق صوتك صداك غنيتي
*********
*********
رشحت حلقك لإذاعات الشجر
والمنتظر من عودة المدعو المطر
وللمسادير و الطنابير
واللسة في رحم القصيد
والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة الى فاتت مني هسة
*********
*********
يا واقفه بين جرح السحاب
وبين شهقة الأرض البكر
ما كان ده ريد
كان إحتمال تغيير قوانين حركتك
ما بين حديثنا ولحظة الفعل الحقيقي
وإنتباهك إنت للشارع البيرجع تاني لنقطة بدايتو
و إنحيازك إنت للشارع البيرشح في مسام رمل التوقع
وما إتعرف قانون نهايتو
غايتوا أمشى في الدرب البطابق
فيه خطوك صوت حوافرك
يا فرس كل القبيلة تلجموا
ويكسر قناعاتا
ويفر يسكن مع البدو في الخلا
ما برضى غير الريح تجادلهُ وتقنعهُ
*********
*********
إفترضتك لون أساسي
يمنح اللوحة إزدواجية القراية
ويفتح الضوء بين خطوط الريشة والخط الإضافي
الجاي من شبكية الزول البشاهد
وإكتشفنا الرسمك وأنا برضو التوارد في الخواطر
نفس أرقام التذاكر
البيها سافرنا وشهدنا
إنفجارك في الأرض
يا سمرة يا واضحة
*********
*********
ما غنيت يوم جيتك صدفة
قبل أبداك كان غصنك بشر
يوم ما كان إحساسك مسى
عرج غيمك فيني ومطر
لحظة طار عصفور من صدرك
رتب فينا إحساس بالإلفة
ودوزن عصب الزمن الأشتر
وإتوكلت عليك وقلت
المارق منك داخل جرح الوردة
وراسم فوقا غناوي الطل
المارق منك
رجع للغابات العرب العاربة
وللعتمور الزنج الهاربة
وأدى الكون مفتاح الحل
المارق منك
شادد عصب الورقة وحرفي
وراصد في اللاوعي سكون مواعيد
صحوه وحلمه ولونه
وشاري يقينك في ظني
وسارق لحظة إني أفكر
المارق منك مارق منك
أو مت شهيد
*********
*********
ما تتضاري ورى الدعوات
وما تتلبسي فرح الفات
يسكن فيك النغم الزايف
ويسرق حاسة شوفنا الواقفة
على رجلين جوانا
ونحن الهاويه والمطامن من الأرض
آه من نحلك ساعة يرحل
ولمن يكتب فينا الحنضل
ويختم عمره بفعل الشهد
*********
*********
قال الجدول :
طلوع النخلة مرور الريح واحد
لكن الريح بتعانق حقل
ونحنا بنطلع نخلة وننزل
ونكتب في ذاكرة الصفق الأخضر
سجنا الريح في الورق الأبيض
وجهناها ضد التمر الناعس
يسقط زي قبعة الحارس
زي الكان بيناتنا وفات
*********
*********
قالت غيمة
بين قوسين غيمة لئيمة:
أولاد الشارع فهرس لي كل المدن
التهرس جوفك بالأسمنت
*********
*********
قالت ريح :
شوف الناس قنديل
لو ما نور يحرق كوخ
وباقي الحلة تنور
أو جبة جوخ أو ينزل بوخ
يقول للنسمة الزايفة أقيفي
لو تتفرد ريح
تتشرد ريح
ريح الخوف
لو تتفرد ريح
تبدأ تفرتق ضفائر المدن الكاذبة تعيد تسريحتك
*********
*********
يوم سمايتك شكل قامتك
كيف تموتي وتحيي تاني
ويوم قيامتك
هو البيدينا الثبات
يا مجلوبه في قافلة رق
ما بستحمل صدرك رصاصة ظلم
يا صابت رحم الفال يا قطعت حبل الحلم
يا كنا نبيعك يا نسرق
إخترنا النار الضلها بيحرق
طمناك إنو الدنيا بخشها ضوء
يجرح جلد العتمة
لما الليل قربان فجرك
*********
*********
يا بت يا نيل يا بت يا نيل
لو نامت قمحة على الأبيض واتشرت زيو
وزاد الأبيض في غيو
ومدد رجلة اليسرى
ما كان الكسرة جاتك من بره . صفرا ومنكسرة
*********
*********
زوجناك الشهداء أولاد الكد
الماتو عشان الشعب
زوجناك ما عندك ضرة
زوجناك ما جاتك ضرة
ما إنشاف ماعونك في الحلة يساسق
ويلقى فتات
*********
*********
قال الأبيض للأزرق :
يبقى ضد الانتباه
وضد تواريخ التمازج
بيني بينك
وده البشوفك في مراهقة الخرائط
وفينا من وجع المسافرين
واطه مالاقت هوية
*********
*********
رد الأزرق :
مطر الحبش لو كان نبش جواك سقف
وهد حيلك في الدواخل وشد عصبك في المداخل
صوت مراكبي وايد بتسأل في القمح
وفينا من فرح المسافرين
قصة الشمس القضية
*********
*********
يا أعشاب النيل الأبيض
ماتتضاري ورى الدعوات
أقرا تاريخك أخاف
أقرا تاريخي … أخاف
أسأل جبين الفجر
ألقى الفجر مطعون في القفا
هل سافرت في دمعك المحقون جفا
حبة غضب
ما شلنا جمرك وإنطفا
جوانا نارك والمطر
جايين بالكتابة
وضربة الناس المهابة
لو هز نخلك باشبزق
ما فارق التمر السبيط
وما ساور الطورية شك
إنو الأرض أنثي وبتحمل بالحلال
مين اللي قال إنو المسافة
البينا بين الشمس طاقة
أو مياه النيل بتدخل
في عروق السنبلة
المسقية بي عرق
الجعانين والمساهرين بالبطاقة
*********
*********
أقرأ تاريخي وأقيف
أقرا تاريخك وأقيف
جواك والزمن النضيف
جواي من جواك غضب
سلم مفاتيح السؤال
جيل الشمس موكب حريق
واقف على باب الدخول
بيناتو بينات الوصول
لحظة شهيق000

سيناريو اليابسة الشاعر عاطف خيري
الهدهد:
مخدوش الفضا
طويل الحزن مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان شهيق
لونو زى سرك تكلمبو الصديق
أمو تتوحـّم على طين البحر
قبال تقابل والدو صدفة على الطريق
عمرو ستة شهور حِلِم
إنو الأرض مسجونة فى موية وكل الناس مراكبية
اليابسة فِركة مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر
الليل خِمار القمرة مجدوع فى الفراغ
والرقصة لى البت فينا
فوق كل المسامير الندقها فى البساط
والرياح حكـّامة بى دلوكة مرّقت الشياطين منها
إتجنن فقير الحلة دقيناهو بى نفس السياط
كل المجرات النيازك والشُهُب
ودع راميهو الله على السما
والدنيا زار
ويا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون والصرير
منهوبة مقبرة الفواكه فيكى
قولى معاى يا شرف القبايل جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة
وأدنقر ألبِّسا شبط أخضر
وأبيت مبلول وأصلِّح فى الرباط
أنا ليه شبابيك البيوت الواجمة والناس البُساط
وليه يرجانى النخل
فى السكة يفتح قلبى خمارة وخلاوى
وبيت بكا
تعبت من المساسقة والهتاف ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة وأناولك كاس
ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف ولد
إشتبهوا فينى ورا الجبل
شافونى دسيت الهداهد بالزبد
صفا !
إنتباه !
وقعت من الهدهد بلد
نهبوها وإتقسموا الحدود
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام إتوضا مارق للصلاة
القانقرد فى حزنو يغزل شاله من صوف
الطواويس شارّة قمصانا المزركشة فى الضحى
الزرازير بى عراريقا المغبشة جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
حجر الدُّغُش فى الموية يقلع ضُفرى
يادم !
ده ما وكت الرسم واللون
وجات المغارب حننت إيدا ومشت
سبحانك الأديتنا من حزنك فوانيس
ــ الغراب يا نوح طفش
واليابسة وين ؟
يا الله ما يابس سوى حلقى المجرح بالدعا
طير يا حمام !
ـ الحمام يا نوح يجامل فى السما
وبيّاع مناديل خضرا فى كل العصور
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة والليل والشتا
الهدهد تميمة الموت
معلّق فى بيوت الناس نعش
من خرافاتن تعال
من دياناتن تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخايدة فى الدم القديم
مين يوصف بيتنا لى هدهد يتيم
مين النبى القادم؟
من مكة !
أو من دكة !
فى شارع حميم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم
مزيداً من الطين يا إله
أبنى خوفى عليك ومنك
أبنى آخر بيت حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
يا هدهدى المهدود
مين هدهدك نمت
كل الطيور غنت منك يجينى سكوت
مين الهداك للناس
أو هدّ فيك الموت؟
يا أوسم الجايين أنا قلبى حِلّة حنين
والشوق فتحنى بيوت
يا صالحة
لا جنبك لا فتّ منك فوت
دايماً معلق بين
بين الحياة والموت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة بالنسيج
وصيوان عزا نوح
المكفّن بالوعود
هدهد يرك فوق دفــّة المركب يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
الشموس فاقت
ونوح بعاين فى مفاتن اليابسة
تغسل فى حصا ومتبرجة
سبحانك الأديتنا من ملكك سلاطين وإختفيت
هاك أنبياءك سالمين
وأنزل مسافة توجعك غابة
رقيصنا الحى
طبولنا
وليك شبال
من اليابسة الممشّطة بالملح
وهدهد

حوار الشاعر / عاطف خيري
تــانــى الـنـهـارات عـاودتـنـي
وكـان الـخاطر مـاطر ، وشـهوة صحو
مــن ويــن عـرفـتني وضـارتـنى
فـــــــــى ضـــــــــو
لا منى ولا منو. والورطني فى الموت لااذكر
غــيـر شــارع وحـمـى الـكـاكاو
ومــــــشــــــيــــــت
- أتــرك فــي الـنـهر كـمـا هـو
يـتفاءل بـيك الـموج ويـشيلوا يدسو بعيد
فـى شـاطىء مـن عين الموت شان ترجع
- مــــوزع بــيــن شــاطـىء
وقـــــــــوز رمــــلــــه
زى قـــــــــريــــــــه
- والـطـيور الـداخـلة فــي دمــك
تـنـقّد بـأرتـياح بـاقـى الـصـباح
- يــاتــونــى لا كـالـعـاصـفـة.
يـأتونى زي صَـقَر الـمواعين والـتسوس
- أرجــــــــــــــــاك ؟
- إتـاخـرت قـافـلة خـريفك والـرياح
وأنـــــا فـــــي رصــيـفـك
ومـن قـطارات تـطل من كل شباك أمسيه
وتـدهـسـنـى شــجــرة حــنـاء
وأدخــل فــي أضـافـرين الـغـناوى
وإنـتـى مـاشـه يـعترِّ جـواي أسـف
- تـــــــــعـــــــــال
- ما بجيكي وفى حضن كل المسافات سكتين
وفـى ضـهر كـل الـمشاوير خـنجرين
وفـــى خــيـال خـيـلـك وتـــد
بـــــــلــــــقــــــاك
مــحــل داهــمـنـي الــسـمـاء
وانــا فــي طـريـقي الــي الـغياب
صـارى الـرياح في طرحتك ، وفى طرفي
جـمر الـمستحيل.فوقى مـن دوخة الأرض
أنـــا هــسـه مـديـون لـلـسحاب
- والـمـتـعرج فــي جـسـد الـحـله
دا زقـــاق والا وريـــدك أريـــدك
أديـنى صـوابعك ضـارينى مـن الغربة
شــان أرقـص حـبه ، وأهـش نـحلك
حــولـي يـتـفـتح تـوبـى نـوافـذ
واتــسـاقـط يـتـلـقـاني ســمـاء
يـــــــــا مـــحـــبــوب
كـم عام من رغبه وأنت تأجل بيناتنا تساب
كــم عــام إتـعلّق فـي كـتف الـسكه
وصــلـنـا شــجــر الــحـنـاء
نـلقاك نـيزك فـي رحـم الـكون مبذول
لــلــحــمـي والـــــــدوران
وصــلـنـا شــجــر الـحـنـاء
نـلـقاكَ قـطار يـخدش صـمت الـقريه
بـالـضـجـه وريــحــة الـغـربـه
كـم عام من رغبه وإنت تأجل بيناتنا تساب
عـــكّــر ســـكــر قـهـوتـنـا
و أشــــربـــى ودخـــــــن
- الـدنـيا كـانـت مـراهـقه وبـتغمر
إذا فـوقـهـا حـلّـق طـفـل الـفـراش
وانـجـبت انـبـياء بـحـجم الـهـواء
ونــــــــاس لــلــرحــيـل
- يـــــــــا عــــــــاق
نـهـرين فــي دمــك لـلـصحراء
وبـلـدين فــي نـهـرك يـا ولـدي
أحــزانــك جــــواك لــبــلاب
وافــراحـك فـــي كـفـي تـبـلدى
شــقـيـش تـتـكـسـر لـقـطـتـك
دسـيـتـك مــنـك لـــي بــكـره
هـــدهــدتــك حــجــيــتـك
بــت فــي عـيونك ، مـعاكَ وبـدونك
خـوفك عـليها يـشيلها ويـغتغت ،فـوقها
ويـحتحت دواخـلك صـفق. تنوم تشتهيها
تـقـوم تـلـقى فـيـها مـنامك صِـدق
ونـمتَ…خلاص إتـمطقتِ بُـهار الـقُدره
وقـــــــــمـــــــــتَ
- بـيـناتك وشـجـر الـحـناء الـجواك
سـكـه تـفّـوت جـنازة الـليل الـفيني
دفـنـتـك إتـلـفّـتَ لـقـيتني بــراى
صــــحــــيــــتــــك ..
إتــونـسـنـا عــــن الــمــوت
والــفــرقـه الــفــى الــغـيـب
وتـعيش يـا كـتفتنى بـالخيالات الجموحه
نـدهتَ عـلىّ نـفضت إيـدى من القصيده
وجـيت ، لـقيتك والـملاحم فـي الـوريد
لــلـقـلـب مـــشــوار كــــن
بـابـين وشـبـاك مـرحـلي وهـامـش
حــضـرتَ ولــن أعــود لـلـخلف
-مـــــــــا تْـــســـافــر
هــدّت فـيـك الـسكه وشـجر الـشوك
الــمــوت أداك بــــس اســمـه
بــتـفـتـش لــيــه عــنـوانـو
مـسـكـونـه أنــــا … بــيــك
وعــرقـانـه عــتـبـة الــبـيـت
خــطـواتـك وإنــــت مــعــاى
مـــنـــديــل ، مـــنــديــل
فــانـوسـك نــومـنـى وســاهـر
أطــــفــــى الــــنــــور.

منفستو الهمباتة

عاطف خيري

1)

الجسد مُصلاية الروح ,

الروح المفوته كم وكِت

الوكت الموهط في النزوح

طالع أعالي الفوق تحت

تحتك ينقز في سطوح

رهن الأصابع ومتلفت

فالت إذا كنت الجنوح

وحدك منادي ومنفلت

(2)

كان القلب..مضيفه,

والألم,

كماعضَّ الطفل

ثدي امو

صار جبانه في البلد

البقت ما أمو

والفاتوني

في طرف البحر ينْحَمو

أو شالو الحجر وانْحَمو

لي قمريه من فَرْط الشجر صاحت

إلى قمري وأجاب

منْ ثمْ

هدر دمو

(3)

يا خيل..

يانبي.. يابراك

ياليس من مُرضِع بَلاك

لو شفتَ جوه النار جنين

فاطِنو من سقية هلاك

كان شفت جوه الجنه طين

بالِنو لى آدم سواك,

وكان تكفي جقمه من الحنين

وتقنع من الموج الهناك

وماكُنا في جوف الكمين

غنينا غُنوات الفِكاك

صنارة العدم السنين

صارقيلا وحشه وارتباك

(4)

يا غربه نحن مشينا وين

من طَلعتِك نخلة هواي

ومديت أصابعي على المَدين

فتحت ما شايف سواي

غمضنا.. الله ادانا عين

كورَكتي آدم..دم..دم في الغياب

إتصنَّتك كل الجراد الفيني

مسغبة الرتيلا..

الطحلب .. الشوك..اللُعاب

لسان الواطه يتعَرَفْ على طعم الخطايا

اللغه في زريبة ربها

تعجِن حنوط المعنى في قرع السكوت

أتَر البهايم في التراب

تَحلِب بصيرة الراعي من شوفتو اللبن

هسيس توب يرقه

قلعت خوفا في شط النوايا

إبليس حبيس العِلّه في كلمة سجود

والدود يجيك من شَدّه في لفظة تخمُر

تسمع حنين الشمس لي ضل البيوت

همهمة الجرِح لحظة تعود

من غُربة الجسد الخلايا

لَجَنَة لسان الضو إذا نطق الزوايا

ودُخلَة الكاف الصبي

على نون اليّرِن خلخالا في قلب النبي

وتسمع زغاريد العدم

(5)

تشوف الغيمه

في مقلة مراية السَهَلَة راخيه رموشا

تنَتْ في ام شديده القهوه

جاتا الدوشه

في طاقة منام هلواسا لاوذ ود قُزَح

طربان وشايلا الهوشه

خَطَفت توبا

قالت… أخ!

نِست باب حوشا .. فاتح

والمطور الليله كيف مَلبوشه

دسيهو منك فيهو

أو سميهو في الخيل الصحاب

البِخشو الحَضره دون مانوبه

من غير ما يدقوا الباب

البَدَسو الفكره في ضحكة بنات نَعَشْ

البِنادَن قمره, تغسل جمره,

في ريق السحاب

البحرسو الخمره, في النخل

البَصَحي التمره, نص الليل

إذا نقص الشراب

دِسيهو منك فيهو

أو همباتي
غارِز في أتّر شوفتِك

على رمل المناظر ناب

دسيهو منك فيهو

جملة أولياء النحت

سابقين الحواس بي ركعه

نهاضين وينقِفوا من حلوق الشوف

حصان في ضحكتك مربوط

مرق من ليلى ليلك جَنَ

من دُبُرْ اليقين مقدود

كل ما الموج راودك عن نفسو

تعطشي فيني؟!

تفتحي أطلس الخوف

كل ماالليل زاد نجمةفي كتف العسس

جرت العصافير المطار

دخل الشِعِر وَكَر المباشره

والبنات ..

طَفوا الرتاين و….وَلَعَنْ؟!

الخَمَروك فتحوك إنداية ومَشَنْ

الكلما صابحتهِن

سرقَن نهارك ومغربن

الفي صدور هرطقه

واشلاق حليب

بت الذين أحبهم

أنة صريف في كُرنُق الروح

المطر ما ببقى لي زول

المغارب لابسا أقصر من خيال المُفترِي

ونحن مديونين نسيم

تلقاها في أول شريعتا غافيه

فارده شرودا

في الموج الحَتَلْ في بالا ظنّهَاطافيه

غامْتَه حنانا

في إيدا وينقع عافيه

تشبه في الوقع من عشو,

خوفو إذا يطير,

لا يلقى قِبله

لا طفل في إيدو نبله

ولا غصن ذو شوك رحيم..

والبادي أجمل

(6)

حنيت لوجه الله

مسقط غربتي

وخارب طبع هذا المجاز

لدودي لي الغياب

مُشرع ضلمة بقَتي

حتفي..

حبيبي..

ومشتهى أسفي

محاذاتي..

وعلوقي إذا أهنقْ

وفطمتني !

شكرا حزينا

جل من يسهو, ويغمِض فيكا غاية يشبهَك

جالبني في وادي الضريسه

القلبِ فرناغه

وسألتك ذات مشيمه:

_ النهر أعوج من قفاي - أعفيني

من هادي البلاد الذهلله

أعفي الجبال منَ الصدى

والشارع التحتاني من خمج النسيم

أحلاك مكندك في أَمَسَ الإلفه

بالزول الغريب

أجمل من المركب تَطَلْوِح فِلقه

آه أجمل من الخطا

صاح…..شنو؟!

الدم دميره,

النار تَجَقلِب مالا؟!

ماطَعْم الرياح تِنجَم!!

صلي على الهجيج كالنيل

مسك خصر البلاد

ورقص الرقيص الما بيتسمى

طرد من بالو نقنقة البوابير,

لايوق الأغاني

يغازل في البيوت,

غمَر كل الكماين

وما جناهوالعاشق المخبول من قيف الحبيبه

وصاح:

قُعادنا هو مرقة النتن القديم

والجندب الوطني

إذا لابد من هذا الكنيف.

مسادير
عاطف خيري

(1)
خضرا
ويانعة
وحُزنِك سبيب
كأنَك هلال البنات الخصيب
أحبَك إذا ما تَرُجي الحليب
عيونك سَمَا
ورِمشك قريب
يَفِج في الغمامة
ويخَزلُو النحيب
بلاد أنجبتني وقالت غريب
عِطشتَ وسقتني
رُحتَ ولِقتني
فكيف علقَتنِي بذاك الصليب ؟

(2)
باب الروح متاكا
إنسربي
صايحات الحدايق أرعي
قبال منجنيق الخوف
يعاود ضربي
قبل الطير وصعلوك النحل منكبي
هشي العافيه
من تمري المُخَمر وعبي
وزي ما النيل طبق مركوبو
مارق للبحر مُدبي
أدخلي في الجسد محمومه
بالمرض اليحير طبي
وافتحي باب ضريحك
يدخل الدرويش مغبي
وادبغي جلدي
بي قطران مهيج لُبي
زي أتر النعال فوق الرمال مُتربي
كان بهل الجمُر منقد سماي
شن ذنبي ؟
مادام الرماد وسط الشرار مُتخبي
لابد من فضيحه النار
تولع جنبي
تهدي الليل
يهز ضنبو المشاكس كلبي

(3)
قبر الحبيب ضيق
كتمه وضُلمه
لكنو مات بِحلم
تبقى القبور اوسع
أوسع شبه وطنو
وانا شفتو ساعة مات
ماسك طرف كفنو
طرز عليه منديل
منديل لمن دفنو
كأنو كان بسمع
ناضمتو وين النيل
قال لي مشى وبرجع
لكنو كان ضيق
كتمه وضُلمه
سألتو :
قول يا حبيب
هل في الممات جمه
دنقر لمحت الشيب
فوق حاجبو اتلم
قال :
الحياة أحلى
والموت
وجع كاتمو بس قلتو لي الله
ويا الله شفتك وين
قبل النظر يبلى
وقبال ما ابقى جنين
وعضامي تتبل
وريني شفتك وين
قول لي عليك الله